ماسك العناية بالشعر ..

السلام عليكم ورحمة الله وبركاته , كيفكم ؟؟ إن شاء الله بخير ! .. أنا أعتذر إني ما نزّلت تدوينه الجمعه اللي راحت بسبب ظروف السفر وكذا بس إن شاء الله بعوضها <3!

-

-

-

المهم ببدأ بدوينة اليوم اللي أختاروها ثنتين من متابعاتي الجميلات وهي العناية بالشعر :)..  وهالتدوينه عشانهم <3 !

-

أنا شعري الحمدلله كان قليل الكثافه وصار متوسط لعالي مع الاهتمام  ..

بتكلم أول شي عن الأشياء اللي تضّر بصحة الشعر وتعدمه :-

1-      الغذاء غير الصحي سبب رئيسي في مشاكل الشعر , وعشان نحصل على شعر جميل لازم نبدأ عناية من الداخل قبل الخارج , كلنا نعرف طبعاَ وش الغذاء الصحي واللي مو صحي ما يحتاج نتكلم عنّه .

2-      ابتعدي عن الشامبو اللي يكون فيه مواد كيميائية وحاولي تاخذين اللي مكوناتها طبيعية مثل شامبوات : إيفروشيه, والطبية اللي من الصيدلية  .

3-      لا تمشطين شعرك وهو باقي مبلول لأنه بيتقطع ويتساقط .

4-      أحياناً يكون سبب تساقط الشعر اضطراب أو ضغط نفسي عشان كذا ريحي نفسك وحاولي ما تزعلينها قد ما تقدرين .

5-      لا تكثرين استشواره وتجفيفه , وتكثرين من تعريضه للشمس والمويه لأن حتى لو كان شعرك دهني ما يصلح كل يوم تتحممين , فيه شامبوات مخصصه للشعرالدهني وبتجفف  الدهون اللي بالشعر بشكل طبيعي بحيث أنك ما تضطرين تغسلينه كل يوم ويتعب من كثر تعرّضه للماء .

طيب الحين وش الأشياء اللي أسويها عشان تحافظ على شعري ؟

1-      تهتمين بغذائك ونومك وما تحاولين تضغطين نفسك مهما كانت الظروف *) ..

2-      تسوين ماسكات لشعرك مره أو مرتين بالأسبوع سواء كانت طبيعية أو جاهزة  ..

3-      تبتعدين عن كل المحظورات اللي ذكرتها فوق ^ ..

4-      بعد ما تخلصين من الاستحمام غسلي شعرك بمويه بارده عشان تتقفل المسامات وما يتساقط الشعر .

5-      رطبي شعرك ببديل الزيت أو بتونيك الشعر .

6-      لا تخلين الفوطة – منشفه- تطول بشعرك يعني كحد أقصى 10 دقايق وبعدين جففي شعرك بطبطبة ( مدري شلون أشرحها ) =))) ..

الحين عرفنا شلون نحافظ على شعرنا بحيث أنه يكون صحّي وجميل ..

-

-

-

أنا شعري عادي مائل للدهني بس مو خشن لا ناعم وأحياناً يكون الكيرلي الناعم ! طويل لنص ظهري تقريباً ,, استخدمت فيه خلطة صراحه أتعب وأنا أقول جميله!!! ,,, بعد ما تحطينها وتتحممين مستحيل تشمين ريحتها ! وحتى لما تحطينها ريحتها مو مزعجه مره , مفعولها ما يبين على طول لازم استمرار أقل شي 4 شهور بس حلو تعتمدينه طول العمر لو حابه لأنك بتسوينه مره بالأسبوع <3 ..

-

-

* نجي الحين لمكونات الماسك اللي استخدمه وفرق معاي بشعري من قلب >3

 

مثل مو واضح أول شي زيت اللوز *الحلو*

 

 

معروفه فوئد زيت اللوز للشعر , بما أن يوجد فيه فيتامينات تعالج مشاكل الشعر فهذا دليل على أن مفعوله في الماسك واضح وقوي ,,  ومن فوائده بعد للشعر تحسين عمل الدورة الدموية بفروة الرأس وهذا يساعد عن أن الشعر يكون أقوى يعني يحافظ على قوته <3 .. ويساعد على منع تساقط الشعر لأن فيه فيتامين ب6 اللي يساعد على نمو الشعر ..

 



 

المكوّن الثاني زيت الخروع صوّرته بس ما رضى ينزل مدري شفيه :):"( .. المهم أنه نفس الشي من وادي النحل و ريحته شوي مزعجه :/ , يجي قوامه سميك ولزج .. من فوائده أنه يرطب الشعر مرره , ومضاد للجراثيم والفيروسات اللي ممكن تكون بالشعر يعني يحارب هالجراثيم ويقضي عليها مثل المطهر .. وسبب هالمضاد عنصر موجود في تركيبة زيت الخروع اللي هو حمض رسينولايك ..

 

 

العنصر الثالث وهو زيت السمسم , نفس الشي صورته عيت تنزل :( سامحوني بنات راح أنزلها إن شاء الله انستقرام <3 ..

المهم زيت السمسم ريحته مقبوله نوعاً ما . فلما تخلطينه مع زيت الخروع بتخف ريحته شوي .. أنا أبوي جابه لي صراحه مو مكتوب عالعلبه شي يجي في زي الجيك كذا اللي هو الأصلي لكن أنتو عادي استخدموا اللي يريحكم <3..

المهم أن من فوائد زيت السمسم أنه يعطي لمعان وقوة للشعر ويمنع التساقط ويعمل على التخلص من القشره ,ولتنعيم الشعر ..يعني مرره حلو حتى لوتحطينه لحاله جداً ممتاز ..

-

-

الحين نجي لطريقة الماسك :-

 

 4 ملاعق كبيره من زيت اللوز ..

 نص كوب من زيت الخروع ..

 7 ملاعق كبيرة من زيت السمسم ..

تنخلط كل هالمكونات مع بعض وتنحط في علبة عملية تقدرين تاخذين منها ..

 

طريقة الإستخدام :-

أول شي ما ينحط عالشعر كله , لا بس ينحط على منابت الشعر وتدلكينها 3 دقائق , ولو أطراف شعرك تلفه أو تعبانه حطي عليها شوي منها ولفي شعرك بنايلون أو بالكاب حق الزيت.. وخليها من ساعتين ل 5 ساعات مو أقل ولا أكثر ..

وبعدين تغسلينه بشامبو مواده غير كيميائية عشان يحافظ على شعرك ..

 

تونيك الشعر من فازلين

أحب هذا المنتج مرره إذا طلعت وأحس أن أطراف شعري باقي فيها ريحه أو مو مترطبه زيين أحط منه <333 ,, ريحته عجيببه وكمية بسيطه منه تؤدي الغرض بس ينحط عالأطراف ولو شعرك دهني مره استبعديه تماماَ ,, سعره ب 7 أو 8 ريال للحجم الصغير والكبير ب 17 أو 15 كذا ..


إلى هنا أقول لكم  شكرً لقراءتكم ومتابعتكم و إن شاء الله تعجبكم التدوينه , وتنفعكم , اللي عندها أي سؤال تتفضل أنا حاضره <3 .
وأعذروني بنات ما أدري ليش الصور ما نزلت أن شاء الله بنزلها انستقرام >3 ..

أشوفكم بتدوينه جديده , الله يحفظكم ..

 

 

مرطبات الجسم

                                                         السلام عليكم ورحمة الله وبركاته

كيفكم إن شاء الله بخير 3> ! ..

أول شي إن شاء الله راح أحدد يوم بالأسبوع وأنزّل فيه تدوينه عن المواضيع اللي تبونها , وإن شاء الله ما أقصر معاكم , تمام ؟

راح أبدأ إن شاء الله بموضوع اليوم اللي هو الترطيب للجسم وكيف أختار المرطب اللي يناسبني ؟

وبعدها بنزّل تجاربي الشخصية لبعض المرطبات اللي استخدمتها .. 

طيب نبدأ

-

أول شي ليش نرطب بشرتنا ؟

لأن الترطيب يخلي البشرة نضرة وصحية , ولأنه يأمّن الرطوبه للبشره ويمنع الجفاف لها اللي هي من أول الأسباب للستريتش ماركس ( الخطوط البيضاء والحمراء )

كيف أختار المرطب المناسب لبشرتي ؟

صاحبات البشرة الدهنية :-

لا تقولين بشرتي دهنيه ما يحتاج أني أرطبها ! ما يصير كذا ، حتى لو كانت دهنيه لازم تكون البشرة بمعدل الترطيب الطبيعي .. أفضل نوع لك من أنواع المرطبات ( اللوشن ) أولاً لأنه خفيف جداً ثانياً: بيعطيك رطوبه للجسم كويسه وما يحسسك بالتزييت ..

صاحبات البشرة العادية أو المختلطة :-

صاحبات هالبشره يستخدمون الكريمات لأن قوامها وسط مو كثيف زي الزبد والزيوت بحيث أنها تكون صعبة على بشرتك في امتصاصها , ولا تكون خفيفه مره بحيث أنها ما تسوي لك أي شي وما ترّطب , لا هي بالنص بينهم ..

صاحبات البشرة الجافه :-

أنصح اللي بشراتهم جافه أنهم يستخدمون مرطبات ثقيلة مثل الزبد والزيوت بيكون قوامها ثقيل عشان تعطينا ترطيب معتدل وخصوصاً لو كان عندك التهابات يفضل تستخدمين أشياء بدون عطر مثل الفازلين .. 

نجي الحين كيفية ترطيب الجسم :-

أفضل وقت للترطيب لما تكون البشره رطبة يعني بعد ما تطلعين من الشاور جففي جسمك بالطبطبه ورطبي جسمك 3>  .. وبحركات دائرية كأنك تسوين مساج عشان تمتصه البشرة بسرعه =)..

الحين بنجي عند تجاربي مع مرطبات الجسم , أنا بشرتي عادية مائلة للجفاف في الشتاء J .

 هالمرطب الجميل من جرجنز ويدخل في تركيبته زبدة الشيا فترطيبه مرره جميل بالنسبة للبشرات العادية وخصوصاً بفصل الصيف ما يدبق عالجسم وتمتصه البشره على طول , ذي ثاني علبه اشتريها<3 !  

 تلقونه بالسوبر ماركت والصيدليات , وسعره ما يتعدا 30 .. 

نجي عند المرطب ذا من سانت ايفز يدخل في تركيبه زيت اللوز وزبدة الشيا يعني ترطيبه عالي جداً بالنسبة للبشرات العادية وبعد  البشرات الجافه بس مو شديدة الجفاف , حجمه كبير جداً وسعره معقول بالنسبه لحجمه .. لما يخلّص أكيد راح ارجع واشتريه ..

سعره : 35 وينباع بالصيدليات وأحياناَ بالسوبر ماركت . 

هذا الكريم مكتوب عليه لبشرة شديدة الحفاف :/ وهو بالنسبة للبشره العاديه ترطيبه كويس يعني ما ينفع للبشرات الجافه مره أو ممكن تاخذينه وتضيفين أنتِ عليه زيت اللوز أو أي زيت تحبينه .. ما برجع أشتريه مره ثانيه عشان أجرّب أشياء ثانية ..

سعره : فيه حجمين صغير ب18 والكبير ب 25 أو حولها مو متأكده , وينباع بالصيدليات والسوبر ماركت 

 من سوب آند قلوري  THE RIGHTEOUS BUTTER  هي زبده وتركيبها يحتوي على زبدة الشيا وريحتها جميييله مرره لكنها ما ناسبتني أبداً , أول شي ما تتوزع زين قوامها ثقييل مرره مرره , أنا أخذتها مع مجموعة السفر لأن حجمها يجي صغير وكنت بجربها والحمدلله أخذتها مع المجموعه ( لو حابين أتكلم عنها قولوا لي ) .  ما برجع اشتريها لأنها مو وااو بس الريحه حلوه .. 

سعرالكبيره لحالها ما أدري كم بس أقل من 100 .. 

تنباع بصيدلية بوتس 

ما بقول أفشل منتج لكن ندمت أني اشتريته ترطيبه مش ولا بد , يجي منه لكن اشتريته أجربه وتوهقت فيه فصرت أحط منه قبل ما أنام أو بعد ما أتوضأ - مبيّن أني ما حبيته من العلبه المتوسخه - ههههههههههههههههههه , ما برجع اشتريه مره ثانيه . 

سعره : ما أذكر والله بس مو أكثر من 30 .. 

ينباع بالسوبر ماركت والصيدليات ..

كريم فازلين اللون الموحد ترطيبه حلو وتمتصه البشره بسرعه أنا أستخدمه لمنطقة ( الاندرآرمز ) لترطيبه بعد الشاور لأن هالمنطقه ضروري تترطب والمرطبات الثانيه أحسها ثقيله على هالمنطقة فأنا أفضل أستخدمه للمنطقة ذي بس , ولأني استخدمه لهالمنطقة بس آخذ الحجم الصغير وأتوقع سعره ب 15 أو 16 تلقونه بكل مكان <3 ..

آخر شي بتكلم عنه هو هالجل الزيتي من جونسون هو ينحط بعد الشور والجسم مبلول أنا ما حبيته أبداً , لما أحطه طول الوقت أحس بالتزييت بجسمي ومرره ما حبيته , وبعد ما يصلح تعتمدين عليه كمرطب يومي لأني شفت بلوقر أجنبيه تقول أن جاها أكزيما منّه .. 

وبس كذا أكون وصلّت معاكم للآخر , إن شاء الله تكونون أستفدتوا ولو شوي من اللي كتبته .. 

لو عندك سؤال قوليه تحت أو بحسابي انستقرام :

_molymeta 

أشوفكم بتدوينه جديده إن شاء الله <3 ..