كيف تصلحين مكياجك المكسور..! How to fix broken makeup

السلام عليكم ورحمة الله وبركاته .. من زمااااان عن التدوين اشتقت له مرره واشتقت لكم <3 ..

ـ

ـ

بوست اليوم بيكون عن أي بودرة أو شادو أو بلاشر تحبينها وانكسرت , كيف بتصلحينها وترجع مثل أول ؟

طبعاً أنا طاح الشادو الجديد اللي اشتريته من ايلف وما مداني أجربه ولا أتهنى فيه , فقررت أصلحه وبنفس الوقت أنزل لكم الطريقة ,, طبعاً مو أنا اخترعت الطريقة بس شفتها وحبيت أنقلها لكم , للي ما تعرفها راح تفيدكم إن شاء الله .

-

-

نبدأ بالأدوات :-

1-  فرشة من ريل تكنيك أو أي فرشة مشابهة لها .

2-  مسحات طبيّة أو بخاخ فيتامين إي من ذا بودي شوب وفيه بديل له مثل فكس بلس من ماك .

3-  علبة صغيرة .

4-  قطن .

5-  عود خشب زي اللي في الصورة , له حافتين حافة مشطوفة وحافة حادة .

الطريقة :- 

أخذت الشادو والعود والعلبة الصغيرة , طبعاً اللي تعرف أنها بتخبص الدنيا 

 . تجيب حاجه تحت عشان ما يتوسخ المكان ,

فرّغت الشادو اللي انكسر في العلبة بالعود من الحافة الحادة , لازم تتأكدين أن ما فيه شي باقي في علبة الشدوعشان ما يصير فيه قطع كبيرة .

تفتتين الأجزاء الكبيره اللي طلعتيها من العلبة , أعرف قلوبكم بتعوركم عليها مثلي :") ههههههههه ,, المهم فتتوها زين وأنا استخدمت الجزء السفلي من الفرشة عشان تفتت زين وأسرع .

بعد ما تتأكدين أن ما صار فيه أجزاء كبيرة وخلاص صارت مثل البودرة , اعصري المسحات الطبية عليها أو بخي من البخاخ عليها عشان تصير سايلة شوي وتقدرين تتحكمين بتشكيلها , بالنسبة للكمية اللي عندي حطيت مسحتين طبية وبخيت بختين من البخاخ , عادي تحطينهم مع بعض .

بعد ما تحطينها تحركينهم مع بعض الما يصير نفس اللي بالصورة .

وتأكدي أنهم أنخلطوا زين .

بعدها تحطينها بالعلبة حقتها وتبدأين تخلين سطحها مستوي مثل أول , بالعود من الجهة المشطوفة مثل اللي بالصورة يسهل لك , وعلى حسب المساحة اللي عندك يعني أحياناً تكون المساحة أكبر تحتاجين شي أكبر عشان تخلين سطحها مستوي , بس أنا استخدمتها لأن مكان الشدو ضيّق ولازم شي دقيق .

هنا بعد ما خليت سطحها مستوي .

أخذت القطن وضغطت عليها عشان تجف شوي من فوق , وبنفس الوقت أثبّتها بنفس شكلها . 

بعدين أخذت الفرشة ونظّفت فيها الحواف . 

وهذا شكله النهائي , صح مو مثل أول بس ترتب شكله و عشان ما يحوسني لما أفتحه اذا احتجته .  

-

-

هذا كل شي في هذا البوست , إن شاء الله يكون أعجبكم وأفدتكم  .. أي سؤال أكتبوه تحت عشان يكون مرجع للكل <3 .

مشترياتي وريفيو لبعض المنتجات.. |

السلام عليكم ورحمة الله وبركاته ..

أول بوست أكتبه عن مشترياتي , بما أن فيه منكم طلبوا هالشي منّي <3 .

 

 

نبدأ بمشتريات سنتربوينت :-

 

1- بي بي كريم من مايبلين , المدح علييه مررره كثير تحمّست أجرّبه خصوصاً أني ما أحب أستخدم الفونديشن مرره فأكثر استخدامي عالبي بي كريم وملّيت من قارنييه , وحبيت التغيير .

سعره : 43 ريال

 

2- مرطبات بيبي ليب ستيك من مايبلين ,المدح عليها مو طبيعي و.. و.. و.. , فقررت أنا أجربها بنفسي , و أول مره أجربها وبكتب لكم ريفيو لما تبيّن نتيجتها إن شاء الله <3 .

سعرها : 15 ريال للواحد .

-

-

مشترياتي من سيتي ماكس :-



 

 

مسكارا من ريميل الأورنج ينقال أنها للتكثيف , وشفت بنت خالتي عندها مثلها وجربتها ومرره حبيتها , قررت أشتريها وأعطيها حقها بالتجربة , وأحكم عليها صح وبعدين أقولكم لو أعجبتني .

سعرها : 45 ريال  .

-

-

مشترياتي من أفضل مكان عندي, صيدلية بوتس =))  :-

 

مقشرFLAKE AWAY  من سوب آند قلوري سبق  وتكلّمت عنّه هنا

وأعجبني مررره , ورجعت أشتري الحجم الكبير منه .

سعره : 75 ريال .

 

 

اللوشن بعد من سوب آند قلوري بصراحه أكثر إنسانة حمستني عليه الجميلة  @Rody_beauty  

حبيييته مرره منها ومن أول أحب منتجات هالماركة , وكنت أبي مرطّب منهم بحكم أنّ الزبدة ما ناسبتني , فقررت أشتريه . 

سعره : 95 ريال .

 

مزيل المناكير من بوتس , أخذته لأني كنت مضطره عليه ,, لأن خلّص الاسيتون حقي .

سعره : 12 ريال .

 

شاور جل من بوتس من شكله مبيّنه مكوناته اللي هي من جوز الهند واللوز .

أخذته لأني أبي أجرّب أشياء من عندهم ولأن مكوناته تحمّس , وسعره بعد مرره حلو .

سعره : 25 ريال .

 

مرطّب العناية بالأقدام من هيمالايا , كنت أحتاج مرّطب للأقدام مناسب لأنه ما عندي , وأشتريته مبدأياً مرره حلو ترطيبه تمتصه البشرة بسرررعه وترطيبه عمييق بنفس الوقت .

يجي منّه أحجام كبير ووسط وصغير .

أنا أخذت الصغير لأني خفت أنه ما يعجبني , بس نتيجته مرره حلوه زي ما قلت –مبدأياً - , ولأن ريحته مبيّنه فيها الحلبة شوي فما أعجبني لكن بأعطيه حقه من التجربة وبعدين أقولكم عن تجربتي معاه.

 

آخر شي كان مرّطب النهار من غارنيه يرطب البشرة بشكل طبيعي وبدون ما يعطيك إحساس التزييت وتمتصه البشرة بسرعه ويخلي وجهك ناعم .. بالنسبة لي أفضّله مرره وسعره معقول

أحبببه مرره قبل المكياج حطيه وخليه دقيقتين وأبدي في مكياجك بيعطيك لووك بطططل وغير كذا يخلي بشرتك ناعمه , بديل ممتاز للبرايمر لو ما عندك ..

 تكلمّت عنّه في الانستقرام _molemeta .. وذي العلبة الثانية

سعره : 18  ريال .

 

وبس لهنا أكون خلّصت البوست , أشوفكم ببوست ثاني إن شاء الله .. <3

 

أي سؤال عندكم أكتبوه تحت , عشان يمون مرجع للجميع ،) .

 

سوب آند قلوري SOAP &GLORY

السلام عليكم ورحمة الله وبركاته .. رجعت لكم ببوست جديد راح يكون عن مجموعة صغيره أو مجموعة السفر من سوب آند قلوري .

-

-

 

أول شي سوب آند قلوري ماركة بريطانية , أنا شخصياً مره أحبها لسببين :-

1-   أن تعليب المنتجات جميييل جداً يحسسك بالأنوثه <33 ..

2-    ريحتهم مرره حلوه وتعجبني في بعضهم ما يحبها ,يعني إذا تبين تشترين يا تحبين ريحتهم وتشترين يا لا ! لأن ريحتهم قوية مرره كأنها عطر فشميها قبل  .

 

.

.

أنا بالبداية سمعت عليها مدح مو طبيعي وتحمست مره أجربها وبنفس الوقت ترددت أني أشتري كمية كبيرة وما تعجبني , قررت آخذ المجموعة الصغيرة اللي من عندهم وأجرّبها وأحكم , خصوصاً أن اللي في المجموعة أكثر الأشياء اللي جاء عليها مدح ..

المجموعة مكوّنة من 5 منتجات بتكلم عنها وعن تجربتي معاها وهل برجع أشتريها ولا لا بحجم أكبر ..

 

يلا نبدأ:  



 

 زبدة الجسم الحجم الصغير تكلّمت عنها قبل هنا وقلت أنها ما أعجبتني لأن توزيعها صعب شوي , بس ترطيبها حلو ..

برجع أشتريها ولا لا ؟

لا لأنها ما ناسبتني كثير , ولأني بجرب اللوشن من نفس الماركة ..

 

المقشر الجميل FLAKE AWAY

من مكوناته ملح البحر و زيت اللوز وبذور العنب صراحه يستاهل المدح ويستاهل كل ريال يندفع فيه , حبيباته كثيره وتقشر زين وما تذوب بسرعه وفوق ذا بعد ريحته لذيذة <33 و بعد الشاور بتلاحظين أن رجولك فيها لمعه عجيببه منّه ,, طريقته سهله مره : تبللين جسمك وتحطين منه وتقشرين بحركة دائرية , وبس .

برجع أشتريه ولا لا ؟

أكيييد برجع أشتريه إن شاء الله لأنه يعطيني النتيجة اللي أبيها .

 

 مرطب اليدين هاند فود تكلّمت عنه هنا

 

معطر للجسم ومرطب بنفس الوقت , يعني ينفع لو أنتِ مستعجلة وتبين شي ريحته حلوه ويرطّب أنصحك بذا بس ترا الترطيب ما يطوّل ولو طوّل مره بيجلس 3 ساعات ..شخصياً ما أحب اعتمد عليه في الترطيب لحاله لازم مرطب وبعدين أحطه ..و أحب أحطه فوق الزبده يثبّت الريحة مرره <3 ..

 

 

الشاور جل كلين أون مي ريحتته جميله وللدلع بس لو تحبين تدلعين نفسك ..

برجع أشتريه ولا لا ؟ لا لأني أبي أجرب شي جديد بريحة ثانية .

 

 

وبس بكذا أكون أعطيت رأيي في منتجاتهم وكلها أحبهها مره ما عدا الزبده ,, أتمنى تكونون أستفدتوا وأعجبتكم ,,

أي سؤال أكتبوه تحت عشان يكون مرجع للكل ..

تجربتي مع مرطبات اليدين ..

السلام عليكم ورحمة الله وبركاته .. رجعت لكم ببوست جديد عن مرطبات اليدين اللي قد استخدمتها وتجربتي معاها , إن شاء الله تعجبكم <3 ..

 

.

.

ترطيب اليدين مرره مهم لأنك لو ما رطبتيها بتسوّد من الجفاف , بعض البنات لما تسوي شغل البيت ما ترطب يدينها بعد ما تخلص , وبعدين تزعل ليش يديني كذا متشققة وإلا جافه و و و ,, حتى بعد الضوء رطبيها , لازم تكون مترطبة طوول الوقت , أنتِ إذا تبين تحافظين عليها وتوحدين لونها ما يبي لها كريم سحري أو منتجات غاليه أو صعب توفرها لا بالعكس هي خطوتين سويها صح و – استمري- عليها وبتحصلين نتيجة إن شاء الله . أهم شي حاطه كلمة استمري بين قوسين =)) .

المهم الخطوة الأولى هي :

 التقشير قشري يدينك بأي مقشر سواء كان طبيعي مثل زيت الزيتون والسكر أو جاهز مثل كريم كاب أو بايو بالمشمش .

 الخطوة الثانية :-

رطبّي يدينك رطبّي يدينك رطبّي يدينك  =)) ض ر و ر ي , بأي مرطب عندك حتى لو كان خفيف أضيفي له زيت اللوز الحلو وحطيه قبل النوم وألبسي قلفز أو غطيها بنايلون عشان تقومين وهي مترطبه وناعمه ..

 

الحين نجي لعند الكريمات اللي أستخدمتها :

 

كريم جرجنز لليدين ومحيط الأظافر
 

هذا هو الكريم اللي قلت عنّه ويني أنا من زمان ما عرفته :"( <3 ,, مرررره جمييل ترطيبه يبّرد القلب وتمتصه البشره بسرررعه بحيث أن ما يحسسك بالتزييت بيدينك

من مكوناته :-

 

1 - حليب الصويا اللي معروف أنه يرطّب الجلد ويحميه من الأشعة فوق البنفسجيه اللي ممكن تسبب أمراض الجلد الخطيره .

 ومن فوائده بعد أنه يفتّح البشرة ويرجعها للونها الطبيعي اللي يكون متغير من المويه أو عدم الترطيب أو الهواء أو الشمس وغير كذا .

المهم أنه هذا أفضل مرطب جرّبته لليدين ترطيبه جداَ عمييق وما يزيت اليد ويخليها طرّيه , وينفع للكرف والدوامات يخلي يدينك طول الوقت مرطّبه بدون ما تعيدين كل شوي عليها يعني ترطيبه يطوّل إلا إذا غسلتيه بالماي أكيد يروح
برجع أشتريه؟ أكيد أصلاً ذي ثاني علبة .
 سعره 13 أو 14 مو أكثر وحلال كل ريال فيه صراحة .

كريم جليسوليد

استخدامه كثيره ينحط على الجسم وعلى اليدين وعلى الأقدام بعد عزّكم الله , قوامه كثيف وما تمتصه البشره بسهوله , ما فيه خلطه بالعالم مو داخل فيها هالكريم =))) ..
مرره حلو للترطيب فقط ((قبل النوم )) أما بالبيت والدوام ومناسبات ولا تفكرين حتى لأن قوامه ثقيل مو بسهوله تمتصه البشرة يعني يبي له فتره وأتوقع في البيت ما بتجلسين محنطه لازم تقومين وترجعين وكذا فما أنصح فيه إلا قبل النوم بسس ..
برجع أشتريه ولا لأ ؟ لا لأني لو استمريت على الترطيب الجيّد ما يحتاج أحط مرطب عميق قبل النوم.
سعره ب 10 أتوقع من كل مكان بالصيدليات والسوبرماركتس والعطارين ..

 

مرطب اليدين هاند فود من سوب آند قلوري

هذا المرطب تحطينه للدلع بس ,, ترطيبه ما يطوّل كثير يعني 3 ساعات كحد أقصى مع أن من مكوناته زيت الماكديميا وزبدة الشيا بس مدري ترطيبه مش ولا بد  , بس الجميل فيه ريحتته مرره حلوه ينفع للمناسبات لو أنتِ تحبين روائح منتجات سوب آند قلوري بيفيدك مرره ,, تحسين كأنك تبخين عطر على يدينك من جمال ريحته .. وينفع بعد للبيت بعد الشاور بيكون بطل .
برجع أشتريه أو لا ؟ لا بجرّب مرطبات معطره غيره .
بصراحه ما أعرف كم سعره لحاله لكن يجي مع مجموعة كلها ب 125 بتكلم قريب عنها إن شاء الله.

كريم اليدين من فازلين

سبق وتكلّمت عنه بانستقرامي molymeta_

بس اللي حابّه نوّه عليه أن لا تستخدمونه وتتعرضون للشمس لأن فيه حمض الفا هيدروكسي اللي يزيد من حساسية البشرة ,, وممكن يسبب لك حروق ,, لو حابة ترطيبه مره وما تقدرين تستغنين عنّه حطي قبله واقي للشمس على يدينك وأطلعي عادي إن شاء الله ما يأثر ..
هو بعد نفس جرجنز من حيث الترطيب وسرعة امتصاصه للبشره .
برجع أشتريه ؟ أكيييد لو لقيته بشتريه مره حلو للبيت .
سعره ما يتعدا 20 وصرت نادراً ما أشوفه .

زبدة  الشيا من ذا بودي شوب


هالزبدة حلوه لما تحطينها على يدينك بعد كرف =)) يعني مثلاً لو غسلتي مواعين وتحسين بإحساس مزعج بيدينك كأن عليها تراب وعيا يروح استخدمي ذي وكوني كريمة على يدينك , ما متصه البشرة بسرعه مقارنه بمرطب جرجنز بس ما عليها كلام خصوصا أن المكوّن الرئيسي لها زبدة الشيا فبتعطيك نتيجة حلووه ,, ما أحسها تنفع للدوامات لأنها ثقيلة شوية عاليد مو خفيفه مره بتنفع للبيت أو لمناسبات لو أعجبتك ريحتها ..
برجع أشتريها ؟ لا , بجرّب غيرها ..
سعرها : 25 وبالتخفيضات تصير ب 15 أظن .


إلى هنا أكون وصّلت للنهاية .. أتمنى أني أفدتكم , ولو فيه أي سؤال أكتبوه لي تحت عشان يكون مرجع للجميع هنا <3 .




 

ماسك العناية بالشعر ..

السلام عليكم ورحمة الله وبركاته , كيفكم ؟؟ إن شاء الله بخير ! .. أنا أعتذر إني ما نزّلت تدوينه الجمعه اللي راحت بسبب ظروف السفر وكذا بس إن شاء الله بعوضها <3!

-

-

-

المهم ببدأ بدوينة اليوم اللي أختاروها ثنتين من متابعاتي الجميلات وهي العناية بالشعر :)..  وهالتدوينه عشانهم <3 !

-

أنا شعري الحمدلله كان قليل الكثافه وصار متوسط لعالي مع الاهتمام  ..

بتكلم أول شي عن الأشياء اللي تضّر بصحة الشعر وتعدمه :-

1-      الغذاء غير الصحي سبب رئيسي في مشاكل الشعر , وعشان نحصل على شعر جميل لازم نبدأ عناية من الداخل قبل الخارج , كلنا نعرف طبعاَ وش الغذاء الصحي واللي مو صحي ما يحتاج نتكلم عنّه .

2-      ابتعدي عن الشامبو اللي يكون فيه مواد كيميائية وحاولي تاخذين اللي مكوناتها طبيعية مثل شامبوات : إيفروشيه, والطبية اللي من الصيدلية  .

3-      لا تمشطين شعرك وهو باقي مبلول لأنه بيتقطع ويتساقط .

4-      أحياناً يكون سبب تساقط الشعر اضطراب أو ضغط نفسي عشان كذا ريحي نفسك وحاولي ما تزعلينها قد ما تقدرين .

5-      لا تكثرين استشواره وتجفيفه , وتكثرين من تعريضه للشمس والمويه لأن حتى لو كان شعرك دهني ما يصلح كل يوم تتحممين , فيه شامبوات مخصصه للشعرالدهني وبتجفف  الدهون اللي بالشعر بشكل طبيعي بحيث أنك ما تضطرين تغسلينه كل يوم ويتعب من كثر تعرّضه للماء .

طيب الحين وش الأشياء اللي أسويها عشان تحافظ على شعري ؟

1-      تهتمين بغذائك ونومك وما تحاولين تضغطين نفسك مهما كانت الظروف *) ..

2-      تسوين ماسكات لشعرك مره أو مرتين بالأسبوع سواء كانت طبيعية أو جاهزة  ..

3-      تبتعدين عن كل المحظورات اللي ذكرتها فوق ^ ..

4-      بعد ما تخلصين من الاستحمام غسلي شعرك بمويه بارده عشان تتقفل المسامات وما يتساقط الشعر .

5-      رطبي شعرك ببديل الزيت أو بتونيك الشعر .

6-      لا تخلين الفوطة – منشفه- تطول بشعرك يعني كحد أقصى 10 دقايق وبعدين جففي شعرك بطبطبة ( مدري شلون أشرحها ) =))) ..

الحين عرفنا شلون نحافظ على شعرنا بحيث أنه يكون صحّي وجميل ..

-

-

-

أنا شعري عادي مائل للدهني بس مو خشن لا ناعم وأحياناً يكون الكيرلي الناعم ! طويل لنص ظهري تقريباً ,, استخدمت فيه خلطة صراحه أتعب وأنا أقول جميله!!! ,,, بعد ما تحطينها وتتحممين مستحيل تشمين ريحتها ! وحتى لما تحطينها ريحتها مو مزعجه مره , مفعولها ما يبين على طول لازم استمرار أقل شي 4 شهور بس حلو تعتمدينه طول العمر لو حابه لأنك بتسوينه مره بالأسبوع <3 ..

-

-

* نجي الحين لمكونات الماسك اللي استخدمه وفرق معاي بشعري من قلب >3

 

مثل مو واضح أول شي زيت اللوز *الحلو*

 

 

معروفه فوئد زيت اللوز للشعر , بما أن يوجد فيه فيتامينات تعالج مشاكل الشعر فهذا دليل على أن مفعوله في الماسك واضح وقوي ,,  ومن فوائده بعد للشعر تحسين عمل الدورة الدموية بفروة الرأس وهذا يساعد عن أن الشعر يكون أقوى يعني يحافظ على قوته <3 .. ويساعد على منع تساقط الشعر لأن فيه فيتامين ب6 اللي يساعد على نمو الشعر ..

 



 

المكوّن الثاني زيت الخروع صوّرته بس ما رضى ينزل مدري شفيه :):"( .. المهم أنه نفس الشي من وادي النحل و ريحته شوي مزعجه :/ , يجي قوامه سميك ولزج .. من فوائده أنه يرطب الشعر مرره , ومضاد للجراثيم والفيروسات اللي ممكن تكون بالشعر يعني يحارب هالجراثيم ويقضي عليها مثل المطهر .. وسبب هالمضاد عنصر موجود في تركيبة زيت الخروع اللي هو حمض رسينولايك ..

 

 

العنصر الثالث وهو زيت السمسم , نفس الشي صورته عيت تنزل :( سامحوني بنات راح أنزلها إن شاء الله انستقرام <3 ..

المهم زيت السمسم ريحته مقبوله نوعاً ما . فلما تخلطينه مع زيت الخروع بتخف ريحته شوي .. أنا أبوي جابه لي صراحه مو مكتوب عالعلبه شي يجي في زي الجيك كذا اللي هو الأصلي لكن أنتو عادي استخدموا اللي يريحكم <3..

المهم أن من فوائد زيت السمسم أنه يعطي لمعان وقوة للشعر ويمنع التساقط ويعمل على التخلص من القشره ,ولتنعيم الشعر ..يعني مرره حلو حتى لوتحطينه لحاله جداً ممتاز ..

-

-

الحين نجي لطريقة الماسك :-

 

 4 ملاعق كبيره من زيت اللوز ..

 نص كوب من زيت الخروع ..

 7 ملاعق كبيرة من زيت السمسم ..

تنخلط كل هالمكونات مع بعض وتنحط في علبة عملية تقدرين تاخذين منها ..

 

طريقة الإستخدام :-

أول شي ما ينحط عالشعر كله , لا بس ينحط على منابت الشعر وتدلكينها 3 دقائق , ولو أطراف شعرك تلفه أو تعبانه حطي عليها شوي منها ولفي شعرك بنايلون أو بالكاب حق الزيت.. وخليها من ساعتين ل 5 ساعات مو أقل ولا أكثر ..

وبعدين تغسلينه بشامبو مواده غير كيميائية عشان يحافظ على شعرك ..

 

تونيك الشعر من فازلين

أحب هذا المنتج مرره إذا طلعت وأحس أن أطراف شعري باقي فيها ريحه أو مو مترطبه زيين أحط منه <333 ,, ريحته عجيببه وكمية بسيطه منه تؤدي الغرض بس ينحط عالأطراف ولو شعرك دهني مره استبعديه تماماَ ,, سعره ب 7 أو 8 ريال للحجم الصغير والكبير ب 17 أو 15 كذا ..


إلى هنا أقول لكم  شكرً لقراءتكم ومتابعتكم و إن شاء الله تعجبكم التدوينه , وتنفعكم , اللي عندها أي سؤال تتفضل أنا حاضره <3 .
وأعذروني بنات ما أدري ليش الصور ما نزلت أن شاء الله بنزلها انستقرام >3 ..

أشوفكم بتدوينه جديده , الله يحفظكم ..